Assalomu alaykum!

Qadirli shifokorlar, aziz tibbiyot sohasi fidoyilari!

Avvalo, fidokorona mehnati bilan xalqimizga mustahkam sog‘lik-salomatlik ulashib kelayotgan, salomatligimiz posboni bo‘lgan Siz aziz tibbiyot xodimlarini qutlug‘ kasb bayramingiz bilan chin qalbimdan samimiy tabriklayman.

Darhaqiqat, shifokor deganda, hamisha har birimizning ko‘z o‘ngimizda qalb mehri va kasb mas’uliyati bilan dardlarga darmon bo‘layotgan, sog‘lom avlod dunyoga kelishiga hissasini qo‘shib, fidoyilik namunalarini ko‘rsatayotgan jonkuyar insonlar namoyon bo‘ladi.

E’tirof etish joizki, muhtaram Yurtboshimiz tashabbuslari bilan sog‘liqni saqlash tizimini takomillashtirish, uni jahon talablari darajasiga ko‘tarish va aholiga tibbiy xizmat ko‘rsatish sifatini oshirish masalalari davlat siyosatining ustuvor yo‘nalishiga aylandi.

Umuman olganda, mamlakatimizda ta’lim, sog‘liqni saqlash va ijtimoiy sektorning shu kabi boshqa sohalarida amalga oshirilayotgan islohotlar to‘g‘ridan-to‘g‘ri xalqimiz dilidagi orzu-istaklar ro‘yobiga xizmat qilayotir. Zotan, tibbiyot rivoji millat genofondini yaxshilash, xalqimizning salomatlik ko‘rsatkichlarini ijobiy tomonga o‘zgartirish, ona va bola salomatligini muhofaza qilish, barkamol avlodni voyaga yetkazishdek ezgu maqsadlarimizning birdan bir omilidir.

Ta’kidlash joizki, Tomdi tumani tibbiyot muassasalariga zamonaviy tibbiy asbob-uskunalar o‘rnatilishi natijasida malakali mutaxassislarimiz tomonidan murakkab jarrohlik amaliyotlarini amalga oshirish imkoniyati yaratildi. Bu esa xalqimizning tibbiyot sohasidan roziligini ta’minlashda muhim ahamiyat kasb etmoqda. 

Bugun sohada qo‘lga kiritilayotgan barcha yutuqlarimiz zamirida albatta, tumanimizda mazkur tarmoqda samarali faoliyat yuritib kelayotgan soha fidoyilarining beqiyos hissasi borligini hamisha yuksak g‘urur va iftixor bilan e’tirof etamiz.

Dunyoda turli kasallik bor. Ammo, inson salomatligi yo‘lida jonini fido qiladigan, bor kuchini boshqalarga hayot baxshida qilishga qasamyod qilgan-Siz aziz tibbiyot xodimlari egallagan kasb dunyoda tengsizdir.

Qadrli tibbiyot sohasi fidoyilari!

Sizlarni kasb bayramingiz - “Tibbiyot xodimlari kuni” bilan yana bir bor chin qalbimdan samimiy tabriklayman.

Barchangizga mustahkam sihat-salomatlik, oilangizga tinchlik-xotirjamlik, sharafli ishlaringizga ulkan muvaffaqiyatlar tilayman.